درهم

فعمري سبع سنين..كانت اول مرة يعطيني الواليد درهم مكمول ..كان خارج مسافر ملي سلم عليا و عطاه لي .. كان تقريبا غادي يبكي ..يمكن حزنا حيت مسافر و يمكن حزنا على درهم دوز مدة طويلة عندو مخبع..

الواليد عطاني نصائح و وصاني بعدم التبذير و ذكرني بالله و بالدرهم وكان ناقص غي يقول لي هاد الدرهم خاك و اسمو محمود..لكن ملي مشا الواليد مشات فالبلاصة النصائح ديالو حيت بالنسبة لي كانت اول مرة غادي نشد درهم كامل فيدي و يكون ملكي ندير بيه ما بغيت ..و ملي مشيت باش ننعس كان الدرهم تحت المخدة ديالي ..و حسيت براسي فاحش الغنى.

لكن فالليل.. ما جانيش النعاس ..حيت كنت كنفكر فبزاف ديال الحاجات للي يقدر درهم يشريها لي ..تقريبا كنت كنحس بديك الدرهم كيتحرك تحت المخدة ..فواحد المرة تحرك بزاف تا جبرتو فيد خاي محمد للي عامل راسو ناعس ..لكن فمرات اخرى كان كيتحرك غي فخيالي و كيكبر كيكبر حتى يصعد في السماء ويخرج منو الضو..و شوية كيتبعو رأس الحسن الثاني للي كتدب فيه الحياة.. ليخاطبني : شعبي العزيز ..فين انا؟فالصباح هزيت الدرهم و خرجت ..كنت حاس براسي غني ..وتصرفت مع الدراري ديال الحومة للي عارفين ان عندي فجيبي درهم مكمول كشخص غني و تا هما تصرفو على هاد الاساس ..كلشي عاملني بلطف ..و كلشي شكا عليا..حتى الراجل الكبير اللي خدام مصور ديال الحومة خاطبني بلقب : السي نوفل ..حسيت انو لو كان عندي جوج دراهم كنت نأسس دولة..

خلاوني جلست فأحسن بلاصة فالدرجة بلا ما يحتج كيما العادة صاحبي محمد بنحازم و لعبنا الكارطة ..و ربحت ..عاودنا و ربحت ..بقيت غي كنربح رغم اني فالعادة اول من يخسر ..و حتى ملي لعبنا الكرة كانت الكرة كتوصلي من جميع الدراري ..كلشي كيعطيني الكرة و المدافعين الخصوم كيطيحو حدايا …فديك النهار سجلت اهداف فالحارس ..رغم انو فالعادة انا للي كنوقف مور الحارس باش نجيب الكرة..

Leave a Comment

لن يتم نشر عنوان بريدك الإلكتروني. الحقول الإلزامية مشار إليها بـ *